https://lh3.googleusercontent.com/.../w426-h284/15+-+1

2014, ഏപ്രിൽ 27, ഞായറാഴ്‌ച

തിരിച്ചുപോക്ക് (ഒരു തിരിച്ചറിവിന്റെ പൊരുത്തപ്പെടൽ )

എന്നിൽ നിന്നും നിന്നിലേക്കോ
നിന്നിൽ നിന്നും എന്നിലേക്കോ
ദൂരക്കൂടുതൽ .
തീർച്ചയായും നിന്നിൽ നിന്നും
എന്നിലേക്ക്‌ തന്നെ
അതു കൊണ്ടല്ലേ എന്നും എന്റെ ചിന്തകൾ
നിന്നെ അന്വേഷിച്ചെത്തുന്നതും ,പിന്നെ
നിരാശരായ് മടങ്ങി
കണ്ണുനീരിൽ നിന്ന് ഉപ്പു പാടങ്ങൾ
ഉണ്ടാക്കാം എന്ന് കണ്ടുപിടിക്കുന്നതും
കണ്ടോ കണ്ടോ ..നീ ഇപ്പൊ
എന്നോട് തർക്കിക്കാൻ തുടങ്ങും
നിന്റെ ചിന്തകളുടെ വ്യാപ്തിയും
നിന്റെ സ്നേഹത്തിന്റെ ആഴവും
ഒക്കെ കൈവിടർത്തി കാണിച്ചു കൊണ്ട്
അപ്പോൾ ഞാനോ ?.....ഞാൻ
നിനക്കായ്‌ എഴുതി നിർത്തിയ വരികളേയും
കൂട്ടിവെച്ച മഞ്ചാടി മണികളേയും
നെടുവീർപ്പുകളുടെ ചൂടിൽ
വരണ്ടുപോയ ഈ പനിനീർ പൂവിതളുകളേയും
മേശ വലിപ്പിനുള്ളിലേക്കൊതുക്കി വെക്കും ,
ആരും (നീ ) കാണാതെ .
പിന്നെ, ഞാൻ പറഞ്ഞു തുടങ്ങുന്ന
പെയ്തു തോർന്നു പോയ ഒരു മഴയെ -
കുറിച്ചു പൂർത്തിയാക്കാൻ
അനുവദിക്കാതെ ,നീ -
ഇന്നത്തെ മാറിയ
രാഷ്ട്രീയ ഭാവിയെ കുറിച്ച്
ആശങ്കപ്പെടും.
മച്ചിൽ കുടുങ്ങിയ കുറിഞ്ഞിയുടെ
കുഞ്ഞുങ്ങൾ എന്ന എന്റെ ചോദ്യത്തിനു
ചായക്ക് മധുരം കുറഞ്ഞുവെന്നു
നീ മറുപടി പറയും .
ഇനിയെന്ത് പറയണമെന്നറിയാതെ
എന്റെ മിഴികൾ തൊടിയിൽ  പൂത്ത
ഇലഞ്ഞിയിൽ ചെന്ന് തൊട്ട് തിരിച്ചു വരും.
നിന്റെ വിരലുകൾ റ്റി വി യിലെ
ന്യൂസ്‌ ചാനലുകൾ മാറ്റുന്ന തിരക്കിലും.
അവസാനം ..
സാരിത്തുമ്പ് കൈവിരലിൽ 
തെരുതെരെ ചുറ്റി
എന്റെ ഒരു തിരിച്ചു പോക്കുണ്ട്
അടുക്കളയിലേക്കു.

അവിടെ എന്റെ പരിഭവങ്ങൾ
ഓവ് ചാലിലൂടെ പാത്രങ്ങൾ -
കഴുകിയ വെള്ളത്തിനൊപ്പം
തമ്മിൽ തഴുകി ഒഴുകിതീരും.

എന്റെ -
കൊച്ചു കൊച്ചു വർത്തമാനങ്ങൾ
അടുപ്പിൽ കഞ്ഞിക്കൊപ്പം വെട്ടിതിളക്കും.

എന്റെ -
പറഞ്ഞു തീരാ മോഹങ്ങൾ
അരിഞ്ഞു വെച്ച പച്ചക്കറികൾ കൊപ്പം
സാമ്പാറിന് രുചിപകരും .
*****************************************

6 അഭിപ്രായങ്ങൾ:

  1. എന്റെ -
    കൊച്ചു കൊച്ചു വർത്തമാനങ്ങൾ
    അടുപ്പിൽ കഞ്ഞിക്കൊപ്പം വെട്ടിതിളക്കും.

    മറുപടിഇല്ലാതാക്കൂ
  2. സമാന്തരസഞ്ചാരം, ദാമ്പത്യം. എങ്കിലും എവിടെയൊക്കെയോ വച്ച് പരസ്പരം അറിയുന്നില്ലേ ദമ്പതികൾ ? തന്റെ മഞ്ചാടിമണികളേയും മഴയേയും പൂച്ചക്കുഞ്ഞിനേയും ഒന്നും അവൻ അറിയുന്നില്ലെന്ന് പരിഭവപ്പെടുമ്പോൾ, അവന്റെ ഭൂമിയും സമൂഹവും രാഷ്ട്രീയവുമെല്ലാം അവളും പരിഗണിക്കുന്നില്ല എന്നതും സത്യമല്ലേ ?

    ചിലവരികളിൽ കവിതയുടെ അളവ് കുറഞ്ഞുപോയി.

    മറുപടിഇല്ലാതാക്കൂ
    മറുപടികൾ
    1. സ്വന്തം ലോകത്തിൽ നിന്ന് ചിന്തിക്കുന്നവർ ..എന്നിട്ട് ഒരു പൊരുത്തപ്പെടൽ ..വളരെ നന്ദി ഈ വായനക്ക് ..അഭിപ്രായത്തിനു ..

      ഇല്ലാതാക്കൂ